Watan Ko Qaid Se Chhutkar Chali Bahan Bhayya,
Hai Ranj Tujhko Na Main De Saki Kafan Bhayya.
Hai Royegi Tujhe Tazindagi Ye Ma'anjayi,
Luti Hai Karb-o-bala Me Teri Bahan Bhai,
Gayi Hai Bandhi Mere Bazoo Me Rasan Bhayya.
Tujhe Hai Zabha Kiya Zalimon Ne Haye Husain,
Hain Teri Laash Pe Ghodey Gaye Daudaye Husain,
Na Lasha Bhi Tera Karne Diya Dafan Bhayya.
Main Jisko Sath Madine Se Leke Aayi Thi,
Hai Sughra Jiske Liye De Rahi Dohayi Thi,
Wo Tere Samne Ujda Tera Chaman Bhayya.
Jo Ladli Thi Teri So Gayi Hai Ro-rokar,
Bichhad Ke Tujhse Na Zinda Rahi Teri Dukhtar,
Wo Sah Na Payi Judayi Shah-e-zaman Bhayya.
Main Ro Na Pyi Hoon Jee Bhar Ke Tujhko Karbal Me,
Hai Lasha Bhi Tera Begaur-o-kafan Maqtal Me,
Ye Hi To Hai Mujhe Ab Ranj Aur Mahan Bhayya.
'Raees' Rok Qalam Har Taraf Dohayi Hai,
Sada Ye Zainab-e-muztar Ki Dekh Aayi Hai,
Nahi Hai Koi Suney Jo Mera Sukhan Bhayya.
